राज्यातील ग्रामिण भागातील महिलांना महानगरात शासकीय, निमशासकीय, खाजगी तसेच इतर प्राधिकरणात नोकरीच्या संधी मोठ्या प्रमाणात प्राप्त होत आहेत. नोकरीच्या निमित्ताने अनेक मागासवर्गीय महिलांना मुंबई, पुणे व नागपूर या महानगरात यावे लागते. डॉ. बाबासाहेब आंबेडकर यांच्या १२५ व्या जयंती वर्षानिमित्त शासकीय, निमशासकीय, खाजगी इत्यादी प्राधिकरणात नोकरी करणाऱ्या मागासवर्गीय महिलांकरीता मुंबई, पुणे व नागपूर येथे प्रत्येकी एक शासकीय वसतिगृह सुरू करण्याच्या निर्णय सामाजिक न्याय विभागाचा शासन निर्णय क्र. सान्यावि- २०१५/प्र.क्र.९८/ बांधकामे, दिनांक ७ जानेवारी २०१६ अन्वये घेण्यात आलेला आहे. सदर वसतिगृहात महिलांच्या निवासाची व्यवस्था करण्यात येऊन या प्रवेशित महिलांना कॉट, आंथरूण- पांघरूण इत्यादी सोयी उपलब्ध करून दिल्या जातात. सदर वसतिगृहाच्या इमारतीत तातडीच्या वैद्यकीय मदतीसाठी आवश्यकतेनुसार वैद्यकीय सुविधा पुरविण्यात येतात. या वसतिगृहाच्या इमारत परिसरात प्रवेशित महिलांना वाहने ठेवण्याची व ग्रंथालयाचीही सोय करण्यात येणार आहे. तसेच या वसतिगृहात कॅरमबोर्ड, बुद्धीबळ व इतर इनडोअर क्रीडा साहित्य पुरविण्यात येईल.
१) अर्जदार महिला महाराष्ट्राची रहिवासी असावी.
२) अर्जदार महिला अनुसूचित जाती, अनुसूचित जमाती, विमुक्त जाती, भटक्या जमाती, इतर मागास प्रवर्ग, विशेष मागास प्रवर्ग, अनाथ या वर्गवारीतील असावी.
३) अर्जदार महिला ज्या ठिकाणी नोकरी करीत असेल, तेथील सक्षम अधिकाऱ्याने दिलेले नेमणुकीच्या/बदलीच्या आदेशाची प्रत/रुजू झाल्याबाबतचे प्रमाणपत्र अर्जासोबत सादर करणे बंधनकारक असेल.
४) अर्जदार महिलेच्या जवळचे नातेवाईक उदा. आई, वडील, पती हे संबंधित महानगरपालिका क्षेत्राच्या हद्दीत रहात नसावेत.
५) नोकरी करणाऱ्या अर्जदार महिलेचे मासिक उत्पन्न रु. ३०,०००/ पेक्षा जास्त नसावे.
६) काम करणाऱ्या महिलांना जास्तीत जास्त तीन वर्षांपर्यंत या वसतिगृहात राहण्याची मुभा राहील. त्यानंतर वसतिगृह सोडणे अनिवार्य राहील.
७) वसतिगृहात प्रवेश घेतेवेळी रु. ५०००/- इतकी अनामत रक्कम म्हणून वसतिगृहाच्या व्यवस्थापकांकडे जमा करावी लागेल. संबंधित जिल्ह्याचे सहाय्यक आयुक्त, समाज कल्याण हे वसतिगृह प्रवेशाची कार्यवाही करतील.
नाव: नोकरी करणाऱ्या मागासवर्गीय महिलांचे शासकीय वसतिगृह, सदर, नागपूर
पत्ता: सोमलवार भवन, एल.बि. हॉटेलच्यासमोर, माउंटरोड, सदर, नागपूर
संपर्क व्यक्ती: श्रीमती सुजाता रामटेके, अति. गृहपाल
मोबाईल: ७०२०९५३९९४
| अनु क्र. | निवासी शाळेचे नाव | मान्य संख्या | प्रवेशित संख्या |
|---|---|---|---|
| १ | महानगरात नोकरी करणाऱ्या महीलांचे शासकीय वसतिगृह,सदर, नागपूर | शासन निर्णयात मान्य संख्या नमुद नाही | २३ |